'E DDUJE 'MMAMMURATE

I due innamorati

For' 'o balcone tengo 'na cajola
cu' dinto 'nu canario 'ncardellato,
che canta tutt' 'o iuorno a squarciagola
pecchè st'aucelluzzo è 'nnammurato.

E' na canaria bionda comm' a ll'oro,
comm' 'e capille d' 'a padrona soja;
e io pure pe sta bionda me ne moro
e canto appriesso a isso... ch'aggia fà?

E tutt' e dduje cantammo inutilmente
isso "Volare" e io "Anema e core".
Ma 'sta signora bionda è indifferente
e nun o vvò capì ca mme ne moro.

Pure 'a canaria fa comm' 'a padrona,
e st'aucelluzzo mio sta ascenno pazzo...
'E vvote po', si canta, piglia e stona
e i' stono appriesso a isso... ch'aggia fà?