Daniele Palmesi, Federico Clemente Gen 2014

LUNTANO 'A TE

(Antonio De Curtis - 1953)



Me so' 'mbarcato a bbuordo a nu vapore
pe me scurdà na brutta 'nfamità.
Na femmena birbante e senza core,
m'ha miso 'ncopp' 'o punto 'e me dannà.

E mo, ca stongo 'nterra furastiera
luntano, nun l'avesse cchiù penzà.
Io chiagno tutt' 'o juorno, e quanno è 'a sera,
m'addormo stanco muorto d' 'a chiammà.

Luntano 'a te, quanta malincunia,
luntano 'a te, gnornò nun pozzo stà.
St'ammore, ojnè, comme na malatia
me struie, aimè, certo m'acciderà!
Tu si felice, 'o saccio, mo' vuò bbene a n'ato:
e t' 'e scurdate tutt' 'e vase date a mme?
Luntano 'a te, io moro 'e gelusia,
luntano 'a te nun pozzo cchiù campà!

Vurria turnà, ma po' me dice 'o core:
ojh giuvinotto amante nun turnà,
chella mo dorme 'mbraccio a n'ato ammore,
'o nomme tuio s'è scurdato già.

Nun t' 'a piglià, ch' 'a colpa nun è 'a soia,
quanno è destino, nun se pò cagnà!
Nun c 'è che fà si chesta è 'a croce toia,
portala cu pacienza e carità.